Saturday, July 18, 2015

القواعد الأربعون للسوشيال ميديا للمصريين

تصويب لغوي: القواعد الأربعون وليس الأربعين :)


1. مفيش حاجة اسمها سوشيال ميديا لوحدها كده تعمل ثورة، من غير اللي بيحصل على الأرض (مظاهرات، فساد، إلخ) مكنش حصل حاجة. لو شركة/براند خدمة عملاءها سيئة فالسوشيال ميديا أو شبكات التواصل الاجتماعي مش ح تجمّلها.

2. متزعلش من لايك بنت خالتك على بوست وفاة المرحومة مامتك، دي يا إما لسة شارية سمارت فون وايديها لسة مش متعودة عليه، أو كانت بتـ scroll down ومستعجلة فصوابعها خبطت اللايك بدون قصد، دي خالتها

3. سوشيال ميديا يعني تواصل اجتماعي، يعني الـconversations مهمة وعشان كده المؤلفة "ليانا لي إيفانز" بتتكلم في كتابها عن ROC مش بس ROI

4. صورة بروفايلك بتعبر عن ذاتك و أهراماتك.

5. سوشيال ميديا مش بس فيسبوك وتويتر وإنستاجرام، جايز يكونوا أشهرهم بس فيه عشرات المواقع الأخرى اللي الناس و الشركات بيستخدموها أونلاين
مثلا المنتديات ممكن تكون وسيلة رائعة للتسويق الالكتروني (فتكات للسيدات أو نايل موتورز للسيارات)، وكمان تطبيقاتLocation-based  للمطاعم مثلا (Swarm/Foursquare)، و Periscope للفنانين مثلا، وهكذا

6. لو قابلت واحد زي حالاتي بيستخدم الانترنت من 1999 فمفيش داعي تسبهلّ وانت بتسمع منه ذكريات الآيسيكيو و الماسنجر، عشان ولاد أخوك بكرة أكيد ح يستغربوا ازاي عندك إدمان Snapchat و Vine

7. البنات بيسألوا أو يعملوا Search على بروفايلات الولاد قبل ما يشوفوا بعض في النادي أو البيت (في جواز الصالونات) و قبل ما بيصاحبوا بعض (في جواز الصحوبيات)، ونفس الكلام للي بيدوروا على شغل مع اللي ح يقابلوهم في الانترفيو.

8. فيسبوك معندوش أي وسيلة معلنة متاحة للمستخدمين إنهم يعرفوا مين شاف بروفايلاتهم على عكس لنكدإن، واللنك ده أنا بحاول أشرح فيه السبب 

9. استخدام السوشيال ميديا كمصدر للأخبار محتاج توعية و ثقافة (شوف خبر الأهرام ده مثلا). فيه ناس ممكن جدا تصدق فيديو لمجرد إنه اتعرض على قناة تلفزيون ولكنها تشكك في عشرات الفيديوهات على يوتيوب!

10. مهم جدا تتفاعل مع العملاء بتوع شركتك وتشوف بيقولوا ايه عن منتجاتك وخدماتك، من سنين وفيه موظفين في فنادق في مصر بيتكافئوا/بيتعاقبوا على review على موقع TripAdvisor

11. الإعلانات حلوة مفيش كلام، بس يا ريت موظفين فروع الشركة يكونوا عارفين إن فيه مسابقة أو activities على السوشيال ميديا للشركة عشان عيب أوي لما الناس تسألهم ويكونوا مش عارفين، الإنتيجريشن يا إخوانّا

12. عادل إمام قال في عمارة يعقوبيان احنا في زمن المسخ، في الحقيقة احنا دلوقتي في زمن السوشيال ميديا، دور نشر عالمية بترفض تنشر كتب عشان المؤلف معندوش تواجد مؤثر على السوشيال ميديا

13. جزء من تاريخ مصر المعاصر خلال ثورتَيْ 25 يناير و 30 يونيو مدفون في بوستات فيسبوك و تويتر، محتاجين حدّ يوثّق التفاصيل دي (مثلا تفاصيل الحياة 28يناير بدون محمول) قبل ما أصحابها ينسوا الباسوورد خصوصا بعد حذف المجلس الأعلى للقوات المسلحة لصفحته الرسمية على الفيسبوك.

14. اتعملت دراسات (analysis يعني) على خمسة مليون ستيتوس و بوست و كومينت أصحابها قرروا يمسحوها في آخر لحظة قبل ما يدوسوا على زرار Post وينشروها على الفيسبوك

15. لما تعمل تاج أو منشن فيسبوك لحدّ تعرفه في بوست أو كومنت، فاعرف إنك ممكن تكون بتسلّم صاحبك لمراته لو كوميك عن التزويغ لمقابلة العشيقة، أو بتسلّم ابن لأبوه لو البوست عن تدخين السجاير بفلوس تدريب النادي

16. لو انت زي حالاتي بتدوّر من وقت للتاني عن موظفين للسوشيال ميديا، كن مستعدا لأنّ نصّ الشعب يبعت لك سيفيهاته بما فيهم ربات بيوت فاكرين إن دي شغلانة من لا شغلانة له

17. مش كل بوست صورة بنت أو ولد عليها رقم تلفون وكلمة تايه أو مفقود تعمل لها شير، الواحد بدأ يشك إن الأطفال دي بتركّب البوستات دي فوتوشوب عشان يبقوا مشهورين أو عشان صاحب البوست يلمّ فولورز!

18. جزء من تقييم الناس للأشخاص و brands بيكون عبر تفاعلهم ع السوشيال ميديا واللي ممكن في حالات كتير بيتنقل لإنه يكون موضوع دردشة ونقاش في نادي أو اجتماع (فلان عمل شير لبوست عن كذا، إلخ) 

19. احنا في السوشيال ميديا بنتعب وبنعصر أفكارنا عشان حاجات كتير، من ضمنها إن الحملات و المشاريع اللي شغالين عليها تبقى  Viral والجمهور هو اللي يشيّر وينشر نيابة عنّنا، شوفوا الفيديو ده لإحدى شركات الطيران:

20. جزء من نجاحك ع السوشيال ميديا مش بس عدد الفانز، ولكن الأهمّ هو التفاعل مع محتواك Engagement وConversions (كام كليك اتحوّلت لتسجيل على موقع أو إضافة ايميل أو مكالمة هاتفية، وهكذا).

21. مش بعيد وزارة الداخلية المصرية ومباحث الانترنت يكونوا بيراقبوا تعليقات اليوتيوب كمان (بيان للداخلية عن فيديو جريمة ع اليوتيوب تضمن اسم المتهم مطابقا لتعليقات يوتيوب):

22. السوشيال ميديا المفروض تقرّبك من الناس البعيدة عنك (أقارب مغتربين، عملاء محتملين، إلخ) بس متخليهاش تبعدك عن الناس القريّبة منك (أولادك، الأب و الأم، شريك العمر، إلخ).

23. اللي شغال سوشيال ميديا مش حد فاضي و شعره منكوش بيكتب أي كلمتين على صفحة شركة، ده حد بيتعامل مع تكنولوجيا و بيفهم تسويق (وأحيانا سياسة) و بيتعامل مع أكبر و أصغر شخص في الشركة دي

24. السوشيال ميديا ممكن جدا تكون مصدر دخل monetization غير مباشر في أشكال مختلفة في صورة cost reduction أو زيادة مستوى رضا للعميل Customer Satisfaction أو مكافحة الفساد. كمان السوشيال ميديا ممكن جدا تكون مصدر دخل monetization مباشر، قنوات تلفزيون على اليوتيوب بتدر دخل بمئات الآلاف من الدولارات سنويا ولو التلفزيون المصري قرر يبقى موجود بشكل احترافي ممكن جزء مش قليل من أزمات ماسبيرو المالية يتحل.

25. مباديء الفهلوة والاستسهال والاسترخاص ممكن بينفعوا (مؤقتا) ع الأرض لكن ح لو حاولت تطبّق المباديء دي (لو صحّ تسميتها مباديء أساسا) ع الانترنت فانت اخترت نهايتك زي تامر حسني على تويتر في 2012:

26. مراقبة الجودة أو Quality Control مهمّة في السوشيال ميديا عشان ما نلاقيش قناة يوتيوب الرسمية لرئاسة الجمهورية لنك الفيسبوك فيها بيحولك لبروفايل شخصي لشاب من نيجيريا

27. لو بتصاحب ناس شمال وفي نفس الوقت بتدور على عروسة (أو على شغل)، مفيش داعي تخلي لستة الفريندز عندك بابليك عشان منظرك بيبقى وحش أوي.

28. أيوة! فيه سوق سودا للانترنت في مصر (ده غير اللجان الالكترونية). المزيد من التفاصيل هنا http://blog.newegyptconsulting.com/2012/08/paid-facebook-likes-twitter-followers.html

29. الحجب والمنع مش ح يمنعوا الجمهور و الناس إنهم يوصلوا للي هم عايزينه، ألبوم حمزة نمرة (اللي اتشرّفت بقيادة فريق العمل على تسويقه أونلاين) كان بيحقق مليون مشاهدة يوتيوب يوميا خلال أول عشرة أيام.

30. لما تعمل صفحة فيسبوك، تويتر، إلخ لحزب أو شركة، اعمل ده من ايميل على دومين الحزب/الشركة مش من الايميل الشخصي لموظف التسويق عشان لما يغير رأيه وينضم لحزب تاني متخسرش كل حاجة (راجع قاعدة25)

31. لو عندك متابعين وجمهور كتيير، شجّعهم على دعم المبادرات الخيرية. جمهور ماهر زين مثلا اتبرعوا لمنظمة خيرية يـ15ألف دولار أمريكي خلال 3 أسابيع فقط (كان عنده 3.9 مليون فيسبوك فانز)

32. محتوى الفيديو مهمّ، لدرجة إنّ اليوتيوب دلوقتي بيستثمر في تقنيات جديدة (تحت التجربة) تتيح لك تشوف مقطع يوتيوب واحد من أكثر من كاميرا http://www.facebook.com/New.Egypt.Consulting/photos/p.978680715510756/978680715510756

33. ممكن جدا بيزنس كامل يكون تسويقه معتمد على السوشيال ميديا، شوف مثلا برنامج باسم يوسف لما بدأ على اليوتيوب، وأحمد أمين لما عمل فيديوهات لاتصالات بعد نجاحه أونلاين، أو جاليري جاليريستا الشيك في الرحاب وازاي بيستخدموا الفيسبوك http://www.facebook.com/New.Egypt.Consulting/posts/978695305509297

34. الإعلانات حلوة مفيش كلام، بس ركّز في Call-To-Action واضح واعرف ح تحدد معايير نجاح الحملة ازاي (مثلا ح تخصص رقم تلفون و ايميل للحملة الدعائية أونلاين).

35. شغل السوشيال ميديا مش بيظهر من غير مصوّرين الفيديو و مصممين الجرافيك و محرري المحتوى (ع الأقل لما يجي وقت التنفيذ ع الأرض - أقصد ع الانترنت) – الناس دي برنسات ورأيهم مهم

36. لو انت ماسك تسويق براند على تويتر، لو انت Paul  مثلا اعمل سيرش على كلمات زي فطار breakfast ح تلاقي ناس ممكن تتفاعل معاهم بما يخدم البراند بتاعتك.

37. اللي شغال سوشيال ميديا بيكون فاهم أو ع الأقل بيعرف يتعامل مع اللي بيكون فاهم في أدوات التحليل (Google Analytics مثلا) و SEO و سهولة الاستخدام Usability و البريد الدعائي Email Marketing و تطبيقات الموبايل Mobile Apps وممكن كمان Crowdfunding  وطبعا التسويق والتحرير و Web Development

38. لو عايز توصل لبوست قديم (مثلا فيه كلمة سوشيال ميديا) على صفحة فيسبوك (مثلا صفحتنا)، ممكن توفّر وقتك وتفتح جوجل وتكتب في خانة البحث الآتي
www.facebook.com/NewEgyptConsulting/posts سوشيال ميديا

39. صاحبك أو قريبك اللي انت مسترخمه عشان بيكتب كومنت (أو بيعمل لايك) على كل بوست وكل صورة ليك ده عادة أكتر واحد بيحبك.

40. دايما شوف آخر الأخبار و التحديثات من المواقع العالمية (زي Mashable و قسم التكنولوجيا في بي بي سي)، ودي لستة بأشهر المواقع المصرية يا ربّ تكون مفيدة :)

Related Posts

Related Posts Plugin for WordPress, Blogger...